Зіма

RSS Feed
Сярэдняя: 4 (3 галасоў)
Прыйшла зіма  халодная,
      Нягодная зіма, —
Цярпі, зямелька родная,
      Няма жыцця, няма.

Прыцьмілась сонца яснае,
      Прыціх шум баравы;
На полі пустка страшная —
      Ні збожжа, ні травы.

Снег белы мертва сцелецца
      Пасцеляй грабавой,
Сапе, шуміць мяцеліца,
      Мяце снег, як мятлой.

Мароз, як кат бязжаласны,
      Ў лёд рэчкі акаваў,
Стральбой сваёй бязрадаснай
      Па сценах біць пачаў.

Стральбой сваёй праклятаю
      У лёт слабых птушак б'е,
Пры хаце і за хатаю
      Спакою не дае.

Хаваюцца ў будоўліны
      Жывёла і народ, —
У снег зямлі абноўленай
      Не міл для іх паглёд.

Ваўкі па сцежках шляюцца
      I ночкаю, і днём
I жудка разлягаюцца
      Магільніцкім выццём.

О, гора падарожнаму
      Іх стада напаткаць!
Не жыць неасцярожнаму,
      Радні не аглядаць.

I вырвуць вочы ясныя,
      I выхлебаюць кроў,
I пойдуць далей, страшныя,
      Шукаць ахвяр ізноў.

Ой, жудасна-халодная
      Ўзгулялася зіма,
Цярпі, зямелька родная,
      Няма жыцця, няма.

Цярпі, старонка родная,
      Мучэнне пі да дна, —
Міне зіма нягодная
      I ўскрэсне зноў вясна!

Ільга сьпяваць на матыў

Ільга сьпяваць на матыў «Елачкі» :-)